مئو ناتھ بھنجن ( A.T.N)
مئو جنکشن پر زیر تعمیر فٹ اوور برج (F.O.B.) کو پلیٹ فارم نمبر 1 سے سعیدی روڈ تک توسیع دینے کے مطالبے کو لے کر شہر کے معزز شہریوں اور عوامی نمائندوں کے ایک وفد نے شہری ترقیات اور توانائی وزیر اے کے شرما سے ملاقات کی۔ وفد نے وزیر موصوف کو ایک میمورنڈم پیش کرتے ہوئے رکے ہوئے تعمیراتی کام کو جلد از جلد دوبارہ شروع کرانے کا مطالبہ کیا۔
وفد نے وزیر موصوف کو آگاہ کیا کہ ریلوے بورڈ سے منظور شدہ تقریباً 10 کروڑ روپے کی لاگت سے تعمیر ہونے والے اس اہم F.O.B. کا تقریباً 60 فیصد کام مکمل ہو چکا تھا، لیکن اچانک کام روک دیے جانے سے شہریوں میں شدید مایوسی پائی جا رہی ہے۔ انہوں نے کہا کہ شہر کی تقریباً 80 فیصد آبادی اسٹیشن کے مغربی علاقے میں رہائش پذیر ہے اور لوگوں کو اسٹیشن تک پہنچنے میں بے حد مشکلات کا سامنا کرنا پڑتا ہے۔
وزیر موصوف نے وفد کی باتوں کی سنجیدگی کو دیکھتے ہوئے فوراً ڈویژنل ریلوے منیجر (DRM)، وارانسی ڈویژن، وارانسی سے موبائل فون پر رابطہ کیا۔ انہوں نے F.O.B. کا کام روکے جانے کے حوالے سے تفصیلی گفتگو کی اور اس بات پر زور دیا کہ مفاد عامہ کی خاطر اسے دوبارہ شروع کرنا انتہائی ضروری ہے۔ ساتھ ہی وزیر موصوف نے ڈویژنل منیجر سے کہا کہ میں اس سلسلے میں آپ سے مزید تفصیلی بات چیت کروں گا۔ وزیر موصوف نے وفد کو یقین دلایا کہ اس کام کو دوبارہ شروع کرا کر سعیدی روڈ پر سرکولیٹنگ ایریا اور بکنگ ونڈو کے ساتھ تمام سہولیات یقینی طور پر فراہم کی جائیں گی۔
اس وفد میں خاص طور سے سالم انصاری (سابق رکن راجیہ سبھا)، ارشد جما (چیئرمین نگر پالیکا پریشد) ، ظفر احم (جنتا ویاپار منڈل)، بھرت لال راہی (سینئر بی جے پی رہنما)، وریندر انجینئر،نریندر سنگھ(ویاپار منڈل)، راشد جمال (اساتذہ رہنما)، سنیل جیسوال (سماجی کارکن) موجود تھے۔
وفد اور شہریوں نے وزیر موصوف کی جانب سے ملنے والی اس مثبت یقین دہانی پر خوشی کا اظہار کرتے ہوئے امید ظاہر کی کہ مئو جنکشن کے اس طویل انتظار والے F.O.B. کے تعمیراتی کام کو جلد ہی دوبارہ شروع کرا دیا جائے گا، جس سے مسافروں اور مقامی شہریوں کو زبردست راحت ملے گی۔
